སློབ་ཕུག་བུཚ་སྡེ་ཆེན་ཅིག་གིས་ རྐང་དུང་དང་ དུང་དཀར་ རྒྱ་གླིང་འཕུ་ནིའི་དོན་ལུ་ དབུགས་བསྐོར་བཙུགས་ཐངས་ཀྱི་ སྦྱང་བ་འབད་བའི་བསྒང་།

སློབ་གྲྭའི་ཆོས་ཕྱོགས་ཚོགས་ཕྲན་གྱིས་ ཆོས་དང་འབྲེལ་བའི་ ལམ་སྲོལ་ཉམས་སྲུང་ལུ་ལྷན་ཐབས།

༉ རེས་གཟའ་ཕུར་བུ་ལུ་ ཉིན་ཡོལཝ་ཅིག་ཁར་ དུང་དང་རྒྱ་གླིང་ དུང་དཀར་ རྐང་དུང་ཚུ་འཕུ་བའི་སྐད་དང་ རོལམོ་བརྡུང་པའི་སྐད་གོཝ་ད་ ས་གོ་དེ་ནང་ འགོ་དང་པ་ ལྷོད་མི་ཚུ་ལུ་ གྲྭ་ཚང་དང་ བཤད་གྲྭ་ ཡང་ཅིན་ ལྷ་ཁང་དགོན་སྡེ་ཅིག་ནང་ ལྷོད་ཡོདཔ་བཟུམ་དང་ ཡང་ཅིན་ ཁྱིམ་ཅིག་ནང་ ལོ་མཆོད་བཏང་པའི་ ཉམས་སྣང་ཤར་ནི་ཨིན་པས།
དེ་འབདཝ་ད་ འདི་བཟུམ་མའི་ མཆོད་ཆས་ལག་ལེན་དང་འབྲེལ་བའི་ སྐད་གོ་མི་དེ་ ཚེས་བཅུ་དང་ རིམ་གྲོ་གཏངམ་མེན་པར་ བཀྲིས་གཡང་རྩེ་རྫོང་ཁག་ བཙན་མཁར་ལ་སློབ་གྲྭ་ལྟེ་བའི་ སློབ་ཕྲུག་ཚུ་ ཉིན་བསྟར་སློབ་སྟོན་གྱི་ཐུན་ཚན་ མཇུག་བསྡུཝ་ད་ སྦྱང་བ་འབད་བའི་ ལས་རིམ་ཅིག་ཨིན་པས།
སློབ་གྲྭ་ལྟེ་བ་གིས་ ཆོས་དང་འབྲེལ་བའི་ ལམ་སྲོལ་ཉམས་སྲུང་འབད་ཐབས་ལུ་ སློབ་གྲྭ་མང་ཤོས་ཅིག་ནང་མེད་པའི་ ཚོགས་ཕྲན་ཅིག་ གཞི་བཙུགས་འབད་ཡོད་མི་དེ་ཡང་ ཨ་ལོ་ཚུ་གི་རྒྱུད་ལུ་ ཀུན་ཚང་ཤེས་ཡོན་བྱིན་ཐབས་ལུ་ཨིན་པས།
དེ་མ་ཚད་ རྒྱལ་ཁབ་ནང་འཁོད་ཀྱི་ སློབ་གྲྭ་ཆེ་འབྲིང་ཆུང་གསུམ་ག་རའི་ནང་ སློབ་སྟོན་གྱི་ཐུན་ཚན་ མཇུག་བསྡུ་བའི་ཤུལ་ལས་ བདུན་ཕྲག་༡ ནང་ ཚོགས་ཕྲན་ཚར་གཅིག་ འགོ་འདྲེན་འཐབ་དགོ་པའི་ ཤེས་རིག་གི་ སྲིད་བྱུས་ཡོདཔ་ཨིན་པས།
ཆོས་ཕྱོགས་ཚོགས་ཕྲན་གྱི་ འགོ་འདྲེན་པ་ སློབ་དཔོན་ཨོ་རྒྱན་ཆོས་གྲགས་ཀྱིས་ ཚོགས་ཕྲན་གཞི་བཙུགས་འབད་དགོ་པའི་ དམིགས་ཡུལ་ངོ་མ་ར་ ན་གཞོན་ཚུ་ ནང་པའི་ཆོས་ལུ་ དད་པ་དང་ཡིད་ཆེས་བསྐྱེད་བཅུག་ནི་དང་ ཆོས་ཕྱོགས་ཀྱི་ ལས་སྣ་ཚུ་ལུ་ སྤྲོ་བ་བསྐྱེད་ཐབས་ལུ་ཨིན་ཟེར་ བཤདཔ་ཨིན་པས།

ཚོགས་ཕྲན་གྱི་ འཐུས་མི་སློབ་ཕྲུག་ཚུ་གིས་ དུང་འཕུ་ཐངས་དང་ རོལམོ་ལག་ལེན་འཐབ་ཐངས་ཀྱི་ སྦྱང་བ་འབད་བའི་བསྒང་།

ཁོ་གིས་འབད་བ་ཅིན་ ཚོགས་ཕྲན་དེ་ནང་ ཆོས་དང་འབྲེལ་བའི་ བསླབ་བྱ་དང་ ལམ་སྟོན་ཚུ་ བྱིན་ནི་ཡོད་མི་དེ་གིས་ ན་གཞོན་ཚུ་གི་རྒྱུད་ལུ་ ནང་གི་བསམ་པ་དང་ ཕྱིའི་བྱ་སྤྱོད་ཚུ་ ལེགས་བཅོས་འབད་ཚུགས་པའི་ འོས་འབབ་ཡོད་པའི་ཁར་ མ་འོངས་པ་ལུ་ རང་གིས་རང་གི་རྐངམ་གུ་ ལོང་སྡོད་ཚུགས་པའི་ ཁེ་ཕན་ཡོད་ཟེར་ཨིན་པས།
ཚོགས་ཕྲན་གྱི་ འཐུས་མི་ཚུ་ལུ་ མཆོདཔ་ཕུལ་ཐངས་དང་ དཀར་མེའི་དོང་རས་འཁལ་ཐངས་ བཞེངས་བརྡ་དང་གཟིམ་བརྡ་ཕུལ་ཐངས་ བསུ་བ་སེར་སྦྲེངས་ དེ་ལས་ དྲོ་པ་ལྷ་བསང་དང་ ཕྱི་རུའི་གསོལ་ཁ་ཕུལ་བའི་སྐབས་ དུང་དང་རྒྱ་གླིང་འཕུ་ཐངས་ཚུ་ སྟོནམ་ཨིན་པས།
དེ་ལས་ དུས་ཅི་ གསར་འཛུལ་འབད་མི་ ཨ་ལོ་ཚུ་ལུ་ ད་ལྟོ་ རྐང་དུང་དང་ དུང་དཀར་ རྒྱ་གླིང་འཕུ་ནིའི་དོན་ལུ་ དབུགས་བསྐོར་བཙུགས་ཐངས་ཀྱི་ སྦྱང་བ་འབད་བའི་བསྒང་འདུག།
ཚོགས་ཕྲན་ནང་འཛུལ་ཏེ་ ལོ་༣ ལང་དོ་ཡོད་མི་ སློབ་རིམ་༡༠ པའི་སློབ་ཕྲུག་ སྒྲོལ་མ་རྡོ་རྗེ་གིས་ སླབ་མིའི་ནང་ ད་ཚུན་གྱི་བར་ན་ ལྷབ་སྦྱང་འབད་མི་ཚུ་ ཁོ་རའི་ ཆ་རོགས་ཚུ་ལུ་ སྟོན་བྱིནམ་མ་ཚད་ སློབ་གྲྭའི་ཆོས་ཕྱོགས་ཀྱི་ ལས་རིམ་ཚུ་ནང་འབྲེལ་གཏོགས་འབད་ཚུགས་པས་ཟེར་ཨིན་པས།
ད་རུང་ སློབ་རིམ་༡༠ པའི་སློབ་ཕྲུག་ སེངྒེ་ཚེ་རིང་གིས་འབད་བ་ཅིན་ གཡུས་སྒོ་ནང་ ལག་ལེན་འཐབ་སྲོལ་ཡོད་པའི་ ཆོས་དང་འབྲེལ་བའི་ ལས་སྣ་ཚུ་ སྒོམ་ཆེན་ཚུ་ལས་ ཨ་ཙི་རེ་ལྷབ་ཡོདཔ་ལས་ ཚོགས་ཕྲན་ནང་ ལྷབ་སྦྱང་འབད་བའི་སྐབས་ གདོང་ལེན་སྦོམ་ མི་བྱུང་པས་ཟེར་ཨིན་པས།
ཁོ་གིས་ སླབ་མིའི་ནང་ ཚོགས་ཕྲན་ནང་ འཐུས་མི་སྦེ་ ཧེ་མ་ལས་ འཛུལ་མི་ཚུ་གིས་ ལྷ་བསང་དང་ སྒྲོལ་ཆོག་ཚུ་ གཏང་ཚུགས་དོ་ཡོདཔ་ལས་ མ་འོངས་པ་ལུ་ གལ་སྲིད་ ལཱ་གཡོག་གི་ དཀའ་ངལ་རེ་ འཐོན་པ་ཅིན་ ནང་པའི་ཆོ་ག་ཕྱག་ལེན་ལས་བརྟེན་ མི་ཚེ་སྐྱོང་ཚུགས་པའི་ ཁེ་ཕན་འོང་ནི་མས་ཟེར་ཨིན་པས།

སློབ་ཕྲུག་བུམོ་ཚུ་གིས་ དུང་དཀར་དང་ རྐང་དུང་འཕུ་ཐངས་ལྷབ་སྦྱང་འབད་བའི་བསྒང་།

སློབ་གྲྭའི་དབུ་འཛིན་ ཀརྨ་ཕུན་ཚོགས་ཀྱིས་ སླབ་མིའི་ནང་ སློབ་ཕྲུག་ལ་ལོ་ཅིག་ ཆོས་ཕྱོགས་ཀྱི་ལཱ་ལུ་ སྤྲོ་བ་ཡོདཔ་ལས་ སློབ་གྲྭ་ནང་ ཆོས་ཕྱོགས་དང་འབྲེལ་བའི་ ལཱ་ག་ཅི་འབད་དགོཔ་ཐོན་རུང་ ཁོང་གིས་ འབད་དོ་ཟེར་ཨིནམ་ད་ ཚོགས་ཕྲན་གྱི་ སློབ་ཕྲུག་ཚུ་ལུ་ བྱ་སྤྱོད་དང་འབྲེལ་བའི་ དཀའ་ངལ་ཚུ་ སློབ་ཕྲུག་གཞན་བཟུམ་ཅིག་ར་ འཐོན་ནི་མེད་ཟེར་ བཤདཔ་ཨིན་པས།
དེ་མ་ཚད་ སློབ་གྲྭ་ནང་ ཆེ་མཐོའི་དཔོན་ཁག་དང་ བླ་སྤྲུལ་ག་བཟུམ་བྱོན་རུང་ བསུ་བ་སེར་སྦྲེང་གི་དོན་ལུ་ ཆོསཔ་ཚུ་ཕྱི་ཁ་ལས་འཚོལ་དགོཔ་ མེད་པའི་ཁར་ ཉེས་འདབས་ཀྱི་ སློབ་གྲྭ་ཚུ་ནང་ ཁག་ཆེ་བའི་ ལས་རིམ་ཚུ་ འགོ་འདྲེན་འཐབ་ད་ བསུ་བ་སེར་སྦྲེང་གི་དོན་ལུ་ ཚོགས་ཕྲན་གྱི་ སློབ་ཕྲུག་ཚུ་ བཏང་དོ་ཟེར་ཨིན་པས།
ཚོགས་ཕྲན་གྱི་ དུས་ཚོད་ནང་ ལྷབ་སྦྱང་འབད་མི་ཚུ་ ཁོང་རའི་སྤྲོ་བ་དང་འཁྲིལ་ བདུན་ཕྲག་ངལ་གསོའི་སྐབས་ ཤེས་མི་ཚུ་ལས་སྦྱང་བ་འབད་དོ་ཡོདཔ་ད་ ཚོགས་ཕྲན་ནང་ འཐུས་མི་༣༥ དེ་ཅིག་ཡོདཔ་ཨིན་པས།
སྤྱི་ལོ་༡༩༧༨ ལུ་ གཞི་བཙུགས་འབད་མི་ བཙན་མཁར་ལ་སློབ་གྲྭ་ནང་ བློ་གསར་ལས་ སློབ་རིམ་༡༡ པ་ཚུན་ཚོད་ སློབ་ཕྲུག་ཡོངས་བསྡོམས་༧༠༠ ལྷགཔ་ཅིག་ཡོད་པའི་གནས་ཚུལ།

སྟོང་ཞང་པ་འཇམ་དབྱངས་ཕུན་ཚོགས།
བཙན་མཁར་ལ་སློབ་གྲྭ་ལྟེ་བ།

About admin

Check Also

གནས་ཚུལ་མདོར་བསྡུས།

སྤྱི་ཟླ་༡༡ པའི་ཚེས་༧ ལུ་ ཐིམ་ཕུག་བདེ་ཆེན་ཕུག་གི་ ལོ་བསྟར་ཚེས་བཅུ་ འགོ་འདྲེན་འཐབ་པའི་སྐབས་ དད་ཅན་བརྒྱ་ལས་བཅད་དེ་ འཛོམས་མི་ཚུ་ལུ་ ཞྭ་ནག་རྔ་འཆམ་དང་ དགེ་བསྙེན་སྐུ་འཆམ་ ཤ་རྫམ་ རྔ་འཆམ་ཚུ་ མཇལ་ཁ་གནང་ཡོདཔ་བཞིན་དུ་ ལོ་བསྟར་ཚེས་བཅུ་དེ་ སྤྱི་ལོ་༢༠༠༣ …

Leave a Reply

Your email address will not be published. Required fields are marked *