དོགས་ཅན་ཚུ་གིས་ ལྷ་ཁང་དང་ དགོན་སྡེ་སོ་སོའི་ནང་ མཆོད་ཆས་ཚུ་ ཨར་རྐུན་འབད་ཡོདཔ་མ་ཚད་ སྐུ་རྟེན་ཚུ་ མེདཔ་བཏང་སྟེ་ ནང་གཟུངས་བཏོན་ འབག་ཡོདཔ་ཨིན་པས། པར་- ཁྲིམས་སྲུང་འགག་སྡེ།

སྐུ་གསུང་ཐུགས་རྟེན་ཨར་རྐུན་འབད་མི་༦ འཛིན་བཟུང་འབད་ཡོདཔ།

༉ ཁྲིམས་སྲུང་འགག་སྡེ་གིས་ སྤ་རོ་དང་ ཧཱ་ དེ་ལས་ ཐིམ་ཕུག་རྫོང་ཁག་ཚུ་ནང་ལས་ སྐུ་གསུང་ཐུགས་རྟེན་ཚུ་ལུ་ ཐོ་བཀལ་ཏེ་ ཨར་རྐུན་འབད་མི་ དོགས་པ་ཅན་ ཕོ་སྐྱེས་༦ འཛིན་བཟུང་འབད་ཡོདཔ་ཨིན་པས།
དེ་ཡང་ ཁ་ཙ་ ཁྲིམས་སྲུང་འགག་སྡེ་ཡིག་ཚང་གཙོ་ཁང་གིས་ གནས་ཚུལ་གསར་བཏོན་འབད་མི་དང་འཁྲིལཝ་ད་ སྐྱེས་ལོ་༢༢ ལས་༢༨ ཀྱི་བར་ན་འབད་མི་ དོགས་ཅན་ཚུ་ག་ར་ སྤྱི་ཟླ་༧ པའི་ཚེས་༦ དང་༧ གྱི་བར་ན་ སྤ་རོ་རྡོ་དཀར་ལས་ འཛིན་བཟུང་འབད་ཡི་ཟེར་ཨིན་པས།
བྱ་ངན་འབད་མི་ཚུ་གིས་ ལྷ་ཁང་དང་ མཆོད་རྟེན་ དེ་ལས་ དགོན་པ་མང་རབས་ཅིག་ལས་ ཨར་རྐུན་འབད་ཡོད་པའི་ཁར་ བྱ་ངན་ལ་ལོ་ནང་ སྐུ་རྟེན་ཚུ་མེདཔ་བཏང་སྟེ་ ནང་གཟུངས་ཚུ་ བཏོན་འབག་ནུག་ཟེར་ཨིན་པས།

སྤ་རོ་རྩེ་ཏོག་མགོན་པ་དང་ ཐིམ་ཕུག་ དགེ་བསྙེན་ཁ་གི་མཆོད་རྟེན།

དོགས་ཅན་ཚུ་ འཛིན་བཟུང་འབད་བའི་སྐབས་ ཨར་རྐུན་འབད་མི་ ཅ་ཆས་མང་ཤོས་ར་ ལོག་ཐོབ་ཅི་ཟེར་ གནས་ཚུལ་གསར་བཏོན་ནང་བཀོད་ནུག།
ཞིབ་དཔྱད་འབད་བའི་སྐབས་ དོགས་ཅན་ཚུ་གིས་ སྤ་རོ་ལམ་གོང་རྒེད་འོག་གི་ རྩེ་ཏོ་དགོན་པ་ལས་ སྐུ་༣ དང་གའུ་༡ ཨར་རྐུན་འབད་ཡོདཔ་མ་ཚད་ རྡོ་དཀར་རྒེད་འོག་གི་ རྡོ་ལེགས་ཁ་ལྷ་ཁང་ནང་ དུས་ཅི་ སྤྱི་ཟླ་༣ པའི་ཚེས་༡༣ ལུ་ རོལམོ་དང་ དངུལ་གྱི་དཀར་མེ་ཀོངམ་ ཕུརཔ་ དེ་ལས་ དུང་ཚུ་ ཨར་རྐུན་འབད་དེ་ འབག་ཡོད་པའི་ མངོན་གསལ་བྱུང་ནུག།
སྤྱི་ཟླ་༥ པའི་ཚེས་༢༧ ལུ་ སྡེ་ཚན་དེ་གིས་ དགེ་བསྙེན་ཁ་ལུ་ མཆོད་རྟེན་ཅིག་སློངས་ཏེ་ ཨིན་ཅི་༦ འབད་མི་ ཟངས་སྐུ་ཅིག་དང་ སྤྱི་ཟླ་༦ པའི་ཚེས་༢༧ ལུ་ རྡོ་ལེགས་ཁ་ལྷ་ཁང་ནང་ལས་ ཨར་རྐུན་ཐེངས་༢ པ་འབད་བའི་སྐབས་ ལྷ་ཁང་ནང་ཡོད་མི་ སྟོན་པ་དང་ གུ་རུའི་སྐུ་མེདཔ་བཏང་སྟེ་ ནང་གཟུངས་སྟོན་པའི་སྐུ་༢ བཏོན་འབག་ཡོདཔ་ཨིན་པས།
ཧཱ་རྫོང་ཁག་གི་ས་གནས་ དཀར་གནག་ལུ་ སངས་སྐྱིད་རི་ལྷ་ཁང་ནང་ལས་ རྡོ་རྗེ་གཉིས་དང་ དྲིལ་བུ་གསུམ་ ཨརཝ་བརྐུ་སྟེ་ འབག་ཡོདཔ་ད་ སྤྱི་ལོ་༢༠༡༩ ཟླ་༢ པའི་ཚེས་༡༩ ལུ་ ཕུར་སྒྲུབ་དགོན་པ་ལུ་ མཆོད་རྟེན་སློངས་ཡོད་རུང་ ནང་གཟུངས་ག་ནི་ཡང་ ཐོབ་མ་ཚུགསཔ་ཨིན་པས།
ཞིབ་དཔྱད་འབད་བའི་སྐབས་ དོགས་ཅན་ཅིག་གིས་ རྡོ་དཀར་རྒེད་འོག་ བཀྲིས་སྡིངས་ཁ་ལྷ་ཁང་ནང་ལས་ བོད་རོལ་ཆ་༡ དང་ ཁྲོ་༡ འབག་ཡོདཔ་སྦེ་ སླབ་ཡོདཔ་ཨིན་པས།
འབྲུག་གི་ཉེས་འགེལ་ཁྲིམས་དེབ་དང་འཁྲིལཝ་ད་ སྐུ་གསུང་ཐུགས་རྟེན་ ཨར་རྐུན་དང་ སློངས་མི་ལུ་ ཉེས་ཁྲིམས་ཚེ་བཙོན་ཕོགཔ་ཨིན་པའི་གནས་ཚུལ།

བཀྲིས་བསྟན་འཛིན།

 

About admin

Check Also

རྒེད་འོག་བསྡབ་ནིའི་ གྲོས་འཆར་ལུ་ རྒཔོ་ཚུ་ སེམས་དང་མ་ལྡན་པར་ཡོདཔ།

༉ ས་གནས་གཞུང་སྐྱོང་ལས་ཁུངས་ལས་ རྒེད་འོག་ལས་བྱེད་ཚོགས་ཆུང་གིས་ རྒེད་འོག་༥༧ དེ་ཅིག་ རྒེད་འོག་གཞན་ཚུ་དང་བསྡབ་ནིའི་ གྲོས་འཆར་བཀོད་མི་དེ་ལུ་ དབང་འདུས་ཕོ་བྲང་རྫོང་ཁག་གི་ རྒཔོ་ཚུ་ལས་ ངོས་ལེན་ལེགས་ཤོམ་མེདཔ་ཨིན་པས། དེ་ཡང་ ས་གནས་གཞུང་སྐྱོང་ལས་ཁུངས་ལས་ རྒྱལ་ཁབ་ནང་ རྒེད་འོག་བསྡོམས་༢༠༥ ཡོད་མི་ལས་ …

Leave a Reply

Your email address will not be published. Required fields are marked *