མི་དབང་མངའ་བདག་རིན་པོ་ཆེ་མཆོག་ ཤེས་རབ་རྩེ་མཐོ་རིམ་སློབ་གྲྭའི་ ལེགས་སྦྱང་བ་ཚུ་དང་ ལྷན་བཞུགས་གནང་པའི་བསྒང་།

མི་དབང་མཆོག་གིས་ ཤེས་རབ་རྩེ་མཐོ་རིམ་སློབ་ཕྲུག་ཚུ་དང་ མཇལ་ཕྲད་མཛད་གནང་ཡོདཔ།

༉ ཁ་ཙ་ མི་དབང་མངའ་བདག་རིན་པོ་ཆེ་མཆོག་གིས་ བཀང་ལུང་ཤེས་རབ་རྩེ་མཐོ་རིམ་སློབ་གྲྭའི་ སློབ་ཕྲུག་ཚུ་དང་ མཇལ་ཕྲད་མཛད་གནང་ཡོདཔ་ཨིན་པས།
དེ་བསྒང་ མི་དབང་མཆོག་གིས་ རྒྱལ་ཁབ་གོང་འཕེལ་གཏང་ནི་དང་ མ་འོངས་པའི་ གནས་སྟངས་ལེགས་ཤོམ་བཟོ་ནིའི་དོན་ལུ་ རྒྱལ་ཡོངས་ཀྱི་ འཆར་སྣང་ཚུ་གི་སྐོར་ལས་ དགོངས་འཆར་ཚུ་ གསུངས་གནང་ནུག།
དུས་རབས་༢༡ པའི་ནང་ གྲ་སྒྲིག་འབད་ནིའི་དོན་ལུ་ ང་བཅས་ཀྱིས་ ང་བཅས་རའི་ ཨ་ལོ་ཚུ་གི་དོན་ལུ་ མ་རྩ་བཙུགས་དགོ་ཟེར་ མི་དབང་མཆོག་གིས་ གསུངས་གནང་ཡོདཔ་མ་ཚད་ འབྲུག་མི་ཚུ་ལུ་ ལྕོགས་གྲུབ་གནམ་མེད་ས་མེད་ཡོདཔ་ལས་ གོ་སྐབས་དང་ ལམ་སྟོན་ཚུ་ ཚུལ་ལྡན་ཐོག་ལས་ བྱིན་པ་ཅིན་ འབྲུག་པའི་ཨ་ལོ་ཚུ་གིས་ ཁོང་རའི་ལྕོགས་གྲུབ་ཧྲིལ་བུམ་སྦེ་ གཡོག་བཀོལ་མ་ཚུགསཔ་ མི་དབང་སྐུ་ཉིད་ལུ་ ཐེ་ཚོམ་ག་ནི་ཡང་མེད་ཟེར་གསུངས་ནུག།
མི་དབང་མཆོག་གིས་ གསུངས་མིའི་ནང་ ད་ལྟོའི་མི་རབས་ཚུ་གིས་ སྤུ་འགྱིར་དྲགས་དང་ རིག་པ་གསལ་དྲགས་ གསར་གཏོད་ སྒྲིག་བཅོས་འབད་ནི་ དེ་ལས་ དེ་འཕྲོ་ལས་ ལྷབ་སྦྱང་འབད་ཚུགསཔ་སྦེ་ འབད་དགོ་ཟེར་ཨིན་པས།
མི་དབང་མཆོག་གིས་ དམིགས་བསལ་དུ་ འཛམ་གླིང་དང་ བརྡ་དོན་འཕྲུལ་རིག་མགྱོགས་དྲགས་སྦེ་ གོང་འཕེལ་འགྱོ་མི་དང་ ད་རེས་ནངས་པར་ འཕྲུལ་རིག་སྣ་ཚོགས་ གལ་ཆེ་བའི་སྐོར་ གསུངས་གནངམ་དང་འབྲེལ་ མ་འོངས་པ་ལུ་ བརྡ་དོན་འཕྲུལ་རིག་ལུ་ ཤུགས་ཆེ་བའི་ ལས་སྣ་ཚུ་ནང་ སློབ་ཕྲུག་ཚུ་གིས་ མཐར་འཁྱོལ་ཅན་སྦེ་ གྲལ་གཏོགས་འབད་ནི་ལུ་ གྲ་སྒྲིག་འབད་དགོ་པའི་ བཀའ་སློབ་གནང་ནུག།
ཁྱེད་ལུ་ཡོད་མི་ འགྲུལ་འཕྲིན་ཨིསི་མཱཊ་ཕོན་དང་ ཡོངས་འབྲེལ་ཨིན་ཊར་ནེཊ་ ཡུ་ཊུབ་ལ་སོགས་པ་ཚུ་གི་ མཐུན་རྐྱེན་ཡོངས་རྫོགས་ལག་ལེན་འཐབ་ཐོག་ལས་ རིག་རྩལ་དང་ ཤེས་ཡོན་ཚུ་ ཡར་དྲག་བཏང་སྟེ་ མ་འོངས་པའི་ ལཱ་གཡོག་ཚུ་ འབད་ཆོག་ཆོ་བཟོ་དགོ་ཟེར་ མི་དབང་མཆོག་གིས་ གསུངས་པའི་ཁར་ ཁྱེད་རའི་མི་ཚེ་ མཐར་སྐྱེལ་དགོ་པ་ཅིན་ ཁྱོད་རའི་དང་འདོད་དང་ ལྷབ་སྦྱང་ནང་ བརྩོན་ཤུགས་ག་དེམ་ཅིག་ བསྐྱེད་ཡོདཔ་ཨིན་ན་ དེ་དང་འཁྲིལ་འགྱོ་འོང་ཟེར་གསུངས་ནུག།
མི་དབང་མངའ་ཞབས་མཆོག་གིས་ མཐོ་རིམ་སློབ་གྲྭའི་ ལེགས་སྦྱར་བ་ཚུ་དང་ཡང་ མཇལ་ཕྲད་མཛད་གནང་ནུག།
སྤྱི་ལོ་༡༩༦༦ ལུ་ མི་མང་སློབ་གྲྭ་སྦེ་ གཞི་བཙུགས་འབད་མི་ ཤེས་རབ་རྩེ་མཐོ་རིམ་སློབ་གྲྭ་དེ་ སྤྱི་ལོ་༡༩༨༣ ལུ་ འབྲུག་རྒྱལ་ཁབ་ནང་ ཆེ་རིམ་ཤེས་རིག་སྤེལ་ཁང་དང་པ་སྦེ་ བཟོ་ཡོདཔ་ད་ ད་རེས་ མཐོ་རིམ་སློབ་གྲྭ་དེ་ འབྲུག་རྒྱལ་འཛིན་གཙུག་ལག་སློབ་སྡེའི་ ཆ་ཤས་ཅིག་ཨིནམ་མ་ཚད་ ལས་རིམ་ཁག་༡༣ ནང་ སློབ་སྦྱོང་འབད་མི་ སློབ་ཕྲུག་༡,༥༠༠ ལྷགཔ་ཅིག་ཡོདཔ་ཨིན་པའིང་གནས་ཚུལ།

About admin

Check Also

གཞུང་གིས་ བཟོ་སྐྲུན་ཅ་ཆས་ཚུ་ ནང་འདྲེན་འབད་ནི་ལུ་ རྩ་འགེངས་དོ་ཡོདཔ།

༉ འཕྲལ་ཁམས་ཅིག་ཁར་ རྒྱལ་ཁབ་ནང་ བཟོ་སྐྲུན་གྱི་ཅ་ཆས་ཚུ་ ནང་འདྲེན་འབད་ནི་ལུ་ དཀའ་ངལ་ཐོན་ཡོད་པའི་གུ་ ད་རེས་ཡང་ སྔར་ག་ཨིནམ་སྦེ་ར་ ནང་འདྲེན་འབད་མ་ཚུགས་རུང་ གཞུང་གིས་ དཀའ་ངལ་སེལ་ཐབས་འབད་ནི་ལུ་ ཆ་རོགས་འབད་བཞིན་དུ་ཡོད་ཟེར་ཨིན་པས། དཀའ་ངལ་དེ་ཡང་ གཙོ་བོ་ར་ ནད་ཡམས་ཀོ་བིཌ་-༡༩ …

Leave a Reply

Your email address will not be published. Required fields are marked *