དྲིན་ཅན་ཕམ་ཚུ་ལུ་ དྲིན་ལན་འཇལ་ནིའི་ཉིནམ་ བརྩི་སྲུང་ཞུ་ནི།

༉ ནངས་པར་ རྒྱལ་བ་ལྷ་ལས་བབས་པའི་ དུས་ཆེན་ཁྱད་པར་ཅན་ བརྩི་སྲུང་ཞུ་ནིའི་དོན་ལུ་ རྒྱལ་ཁབ་མཐའ་དབུས་མེད་པར་ གཞུང་འབྲེལ་ངལ་གསོ་བཞག་ནི་ཨིནམ་ད་ སྐྱབས་རྗེ་རྗེ་མཁན་རིན་པོ་ཆེ་མཆོག་གིས་ དུས་ཆེན་རྩ་ཅན་དེ་ དྲིན་ཅན་ཕམ་ཚུ་ལུ་ དྲིན་ལན་འཇལ་ནིའི་ཉིནམ་སྦེ་ ངོས་འཛིན་གནང་ཡོདཔ་ཨིན་པས།

མཁན་པོ་རྟ་མགྲིན་སྲིད་ཐུབ་ཀྱིས་ སླབ་མིའི་ནང་ སྐྱབས་རྗེ་རིན་པོ་ཆེ་མཆོག་གི་ སྐུ་ངོ་ལུ་ མི་དབང་མངའ་བདག་རིན་པོ་ཆེ་མཆོག་ ཁྲི་མངའ་སྲོལ་མཛད་པའི་ཉིནམ་དང་ རྒྱལ་བཙུན་ཁབ་ཏུ་བཞེས་པའི་ཉིནམ་ དེ་ལས་ འཇིགས་མེད་རྣམ་རྒྱལ་དབང་ཕྱུག་མཆོག་ སྐུ་འཁྲུངས་པའི་ཉིནམ་ ཁྱད་པར་ཅན་ཚུ་ བྱུང་ཡི་ཟེར་ཨིན་པས།

དེ་མ་ཚད་ མི་དབང་རྒྱལ་སྲས་མཆོག་ རྒྱལ་བཙུན་རྗེ་བཙུན་པདྨ་དབང་ཕྱུག་མཆོག་གི་ཕྱག་ལས་ འགོ་དང་པ་ མི་དབང་འབྲུག་རྒྱལ་༤ པ་མཆོག་གིས་ བསྣམས་པའི་ཤུལ་ལས་ སྐྱབས་རྗེ་རིན་པོ་ཆེ་མཆོག་གིས་ བཞེས་གནང་ཡི་ཟེར་ཨིན་པས།

རྒྱུ་མཚན་འདི་ལུ་བརྟེན་ སྐྱབས་རྗེ་རིན་པོ་ཆེ་མཆོག་གིས་ རང་ཟླ་༩ པ་འདི་ དམིགས་བསལ་དུ་ དྲིན་ཅན་ཕ་མའི་ཉིནམ་སྦེ་ བཟོ་གནང་ནུག་ཟེར་ཨིན་པས།

མཁན་པོ་རྟ་མགྲིན་སྲིད་ཐུབ་དང་འཁྲིལཝ་ད་ སྟོན་པ་སངས་རྒྱས་བཅོམ་ལྡན་འདས་ཀྱིས་ སེམས་ཅན་ཚུ་ག་ར་ རང་གི་ ཨའི་འབད་འབདཝ་ཨིནམ་ལས་ ཁོ་ར་ཡང་ ཡུམ་ལུ་ དྲིན་ལན་མཇལ་ནིའི་དོན་ལས་ ལྷ་ཡུལ་ལུ་ བྱོན་གནང་ནུག་ཟེར་ སླབ་ཨིན་པས།

སངས་རྒྱས་བཅོམ་ལྡན་འདས་ ལོ་༦ དཀའཝ་སྤྱད་དེ་བཞུགས་པའི་སྐབས་ ཡུམ་རྒྱུ་མ་ལྷ་མཛེས་ ལྷའི་ཡུལ་ལུ་ བཞུགས་ཡོདཔ་ད་ དེ་བསྒང་ ཡུམ་གྱིས་ ང་ལུ་བུ་ཅིག་ཡོད་མི་དེ་ ག་དེ་སྦེ་ སྡོད་ཡི་ག་ཟེར་ འཇིག་རྟེན་མི་ཡུལ་ལུ་གཟིགསཔ་ད་ བུ་དེ་གིས་ རྒྱལ་སྲས་སྤངས་ཏེ་ མི་ཨིན་ན་ འདྲེ་ཨིན་ན་ མ་ཤེསཔ་སྦེ་ དཀའཝ་སྤྱད་བཞུགས་སར་ གཟིགས་ནུག་ཟེར་ཨིན་པས།

ཡུམ་གྱིས་ ངེ་གི་བུ་དེ་ དཀའཝ་སྤྱད་དགོ་པའི་ གནད་དོན་ག་ཅི་ཨིན་ན་ཟེར་ ཤུམས་པའི་སྐབས་ལུ་ ལྷ་དང་ ལྷམོ་ཚུ་གིས་ སྤྱན་ཁྱབ་ཤོར་མི་དེ་ སངས་རྒྱས་བཅོམ་ལྡན་འདས་ལུ་ལྷུངས་ དེ་ལས་ ཐུགས་ཁར་ཕོགཔ་ད་ ལོ་༦ དཀའཝ་སྤྱད་མི་ལས་ དྲན་པ་གསལ་ནུག་ཟེར་ ཨིན་པས།

སངས་རྒྱས་བཅོམ་ལྡན་འདས་ཀྱིས་ ཁོ་རའི་ ཡུམ་བཤགས་སོ་རུང་ བུ་ལུ་ དེས་ཚུན་ཚོད་ སྡུག་བསྔལ་མྱོང་དགོ་པས་ཟེར་ སྡུག་བསྔལ་དང་ཚ་གྱང་ དཔག་ཏུ་མེད་པར་ ཐུགས་ཁར་བཞེས་ཞིནམ་ལས་ སེམས་ཅན་ཚུ་ག་ར་ ཨའི་ཨིན་ཟེར་ གསུངས་གནང་ནུག་ཟེར་ ཨིན་པས།

མཁན་པོ་དང་འཁྲིལཝ་ད་ ད་ལྟོ་ ང་བཅས་རའི་ ཤ་ཁྲག་ཕུང་པོ་དེ་ ཨའི་གི་ ཤ་ཁྲག་རུ་ཏོ་ཚུ་ བགོ་བཤའ་རྐྱབ་སྟེ་ བཟོ་ཡོདཔ་སྦེ་ ཤེས་དགོ་ཟེར་ཨིན་པས།

རྒྱུ་མཚན་འདི་ལུ་བརྟེན་ སངས་རྒྱས་ཀྱིས་ ཡུམ་གྱི་སྐུ་ཚེ་དང་པ་ བཤགས་སོ་རུང་ སྐུ་ཚེ་༢ པམ་དེ་ ལྷ་ཡུལ་སུམ་ཅུ་རྩ་གསུམ་ལུ་ སྐྱེས་ཡོདཔ་ལས་ སངས་རྒྱས་ཀྱིས་ དམིགས་བསལ་དུ་ རང་ཟླ་༦ པའི་ཚེས་༡༥ ལས་ ཟླ་༩ པའི་ཚེས་༡༥ ཚུན་ ཟླཝ་༣ གྱི་རིང་ ཨའི་ལུ་ ཆོས་བཤད་དེ་ དྲིན་ལན་མཇལ་ནུག་ཟེར་ཨིན་པས།

དྲིན་ལན་འཇལ་ཚར་ཞིནམ་ལས་ རང་ཟླ་༩ པའི་ཚེས་༡༦ དང་༡༧ ༡༨ ༡༩ ལུ་ ལོག་འཇིག་རྟེན་མི་ཡུལ་ལུ་ བྱོན་ཞིནམ་ལས་ཚུར་ ལྷ་བབས་དུས་ཆེན་གྱི་ཉིནམ་སྦེ་ བརྩི་སྲུང་ཞུ་སྲོལ་ བྱུང་ནུག་ཟེར་ཨིན་པས།

སྐྱབས་རྗེ་མཆོག་གིས་ གཞི་འདི་ལུ་བཞག་ཞིནམ་ལས་ འབྲུག་ལུ་སྐྱེས་མི་ག་ར་ ནང་པའི་ཆོས་འབད་མི་དང་ སངས་རྒྱས་ཀྱིས་མཛད་མི་ལུ་ ཁས་ལེན་འབད་མི་ཅིག་ཨིནམ་ལས་ རང་ཟླ་༩ པའི་ཟླཝ་འདི་ དྲིན་ཅན་ཕ་མའི་ཉིནམ་སྦེ་ བཟོ་གནང་ཡི་ཟེར་ མཁན་པོ་རྟ་མགྲིན་སྲིད་ཐུབ་ཀྱིས་ བཤད་ཅི།

རང་ཟླ་༩ པའི་ནང་ རང་གི་ཕམ་ལུ་ དྲིན་ལན་ག་དེ་དྲག་དྲག་ མཇལ་དགོ་པའི་ཁར་ སེམས་ཅན་ཚུ་ག་ར་ འདྲ་མཉམ་སྦེ་ བྱམས་བརྩེ་བསྐྱེད་དེ་ དགེ་རྩ་བསྒྲུབ་ནི་དང་ ལྷ་ཁང་དང་ དགོན་སྡེ་ མཆོད་རྟེན་ཚུ་ བསྐོར་ར་རྐྱབ་པ་ཅིན་ ཕན་ཡོན་སྦོམ་ཡོད་ཟེར་ ཨིན་པའི་གནས་ཚུལ།

བཀྲིས་ཕུན་ཚོགས།

About admin

Check Also

འབྲུག་རྒྱལ་ཡོངས་ཕུཊ་བཱོལ་སྡེ་ཚན་གྱིས་ ཨང་༢ པ་ཐོན་ཡོདཔ།

༉ ཁ་ཙ་ ནེ་པཱལ་པོ་ཁ་ར་ལུ་སྦེ་ འབྲུག་རྒྱལ་ཡོངས་ཕུཊ༌བཱོལ་སྡེ་ཚན་དང་ ནེ་པཱལ་རྒྱལ་ཡོངས་ཕུཊ༌བཱོལ་སྡེ་ཚན་༢ ཀྱི་བར་ན་ ཕུཊ་བཱོལ་རྩེད་འགྲན་གྱི་ མཐའ་བཅད་འགྲན་བསྡུར་འབདཝ་ད་ འབྲུག་གིས་གཱོལ་༡ དང་ ནེ་པཱལ་གྱིས་ གཱོལ་༢ བཙུགས་ཏེ་ རྒྱལ་ཁ་ཐོབ་ཅི། རྩེད་འགྲན་འགོ་བཙུགས་ཏེ་ …

Leave a Reply

Your email address will not be published. Required fields are marked *