ཆུ་ཤོག་ག་ར་ བཀག་དམ་མེནམ་ཨིན་ན?

༉ དུས་ཅི་ སྤྱི་ཟླ་༤ པའི་ཚེས་༡ ལས་ འབྲུག་རྒྱལ་ཁབ་ནང་ གྱིབ་ཤོག་དང་ ཆུ་ཤོག་ཚུ་ ཕད་ཅུང་སྦེ་ ལག་ལེན་འཐབ་ནི་དེ་ བཀག་དམ་འབད་ཡོད་མི་ལུ་ ཡིད་ཆེས་ངལ་རངས་སྦོམ་ཡོད་ཟེར་ཞུ་ནི།
དེ་ཡང་ ཆུ་ཤོག་བཀག་དམ་གྱིས་ ཕྱགས་སྙིགས་འཛིན་སྐྱོང་གི་ གདོང་ལེན་བྱུང་མི་དེ་ མར་ཕབ་འབད་ནི་དང་ རྒྱལ་ཁབ་གཙང་ལྡན་བཞག་ནི་ལུ་ ལྷན་ཐབས་འབྱུང་ནི་གི་ གོ་སྐབས་ཡོད་མི་ལུ་བརྟེན་ཨིན་ཟེར་ཞུ་ནི།
ཨིན་རུང་ ཐིམ་ཕུག་ཁྲོམ་བཟུམ་ཅིག་ནང་འབད་བ་ཅིན་ ཆོས་གཞི་ཅན་གྱི་ ཆུ་ཤོག་དང་ གྱིབ་ཤོག་ཚུ་ ལག་ལེན་འཐབ་ནི་མེན་རུང་ ཚོས་གཞི་དཀརཔོ་འབད་མི་ ཆུ་ཤོག་ཚུ་ ཚོད་བསྲེ་ཚོང་ཁང་དང་ ཤ་ཁང་ཚུ་ནང་ ཚོད་བསྲེ་དང་ ཤ་རིགས་འདེགས་བྱིན་མི་ལུ་བལྟ་སྟེ་ ཧ་ལས་དགོཔ་ བྱུང་ཡི་ཟེར་ཞུ་ནི།
ང་བཅས་ཀྱི་ རེ་བ་ལས་འབད་བ་ཅིན་ ཆུ་ཤོག་ཟེར་བའི་བསྒང་ལས་ ཆུ་ཤོག་རིགས་རྩ་ལས་ ལག་ལེན་འཐབ་མི་ཆོག་ནི་བཟུམ་ གོ་བ་ལེན་ཡོདཔ་ད་ ཚོས་གཞི་དཀརཔོ་འབད་མི་ ཆུ་ཤོག་ལག་ལེན་འཐབ་པ་ཅིན་ བཀག་དམ་དང་ རྒྱབ་འགལ་འགྱོཝ་མ་ཚད་ དགོད་བྲ་བའི་ གཞི་གནད་ཅིག་ཡང་ཨིན་མས་ཟེར་ཞུ་ནི།
འབྲུག་ལུ་ ལོ་ངོ་༡༩ གི་ཧེ་མར་ཡང་ ཆུ་ཤོག་དང་ གྱིབ་ཤོག་ཚུ་ ལག་ལེན་བཀག་དམ་འབད་ཡོད་རུང་ མཐར་འཁྱོལ་བྱུང་མ་ཚུགས་མི་དེ་ཡང་ བཀག་དམ་འབད་ཞིནམ་ལས་ རྗེས་དཔྱད་དང་ ལྟ་རྟོག་ནང་ འཐུས་ཤོར་བྱུང་མི་ལུ་བརྟེན་ཨིན་མས་ཟེར་ཞུ་ནི།
ད་རེས་ཀྱི་ གནས་སྟངས་ལུ་བལྟ་རུང་ ཆུ་ཤོག་དང་ གྱིབ་ཤོག་བཀག་དམ་འབད་མི་ཚུ་ མཐར་འཁྱོལ་མི་འབྱུང་ནི་བཟུམ་མའི་ མཐོང་སྣང་བྱུང་དོ་ཡོདཔ་ད་ ང་བཅས་ཀྱིས་ བཀག་དམ་ལུ་ ངོས་ལེན་སྒྲིང་སྒྲི་འབད་བ་ཅིན་ ཆུ་ཤོག་ག་ཅི་བཟུམ་ཨིན་རུང་ ལག་ལེན་རྩ་ལས་མེདཔ་ བཟོ་དགོ་ཟེར་ཞུ་ནི།

པདྨ་རྡོ་རྗེ།
ཨོ་ལ་ཁ། ཐིམ་ཕུག།

About admin

Check Also

སྤྱི་ཟླ་༦ པའི་ནང་ བདེན་མཆིས་རྫོང་ གསར་བཞེངས་ཀྱི་ལཱ་ ཡོངས་རྫོགས་མཇུག་བསྡུ་ནི།

༉ པདྨ་དགའ་ཚལ་ བདེན་མཆིས་རྫོང་ གསར་བཞེངས་འབད་ནི་ འགོ་བཙུགས་ཏེ་ ལོ་༥ དེ་ཅིག་གི་རྒྱབ་ལས་ ད་རིས་ཀྱི་ཟླཝ་ནང་ བསྒྲུབ་ནི་ཨིན་པས། དེ་ཡང་ དབུ་རྩེ་མ་གཏོགས་ བཟོ་བཀོད་གཞན་ཚུ་ལུ་ ཚོན་བཏང་ཚར་ཡོདཔ་མ་ཚད་ རྫོང་ནང་ན་ཡིག་ཚང་ཚུ་ གཞི་བཙུགས་འབད་ནིའི་དོན་ལུ་ …

Leave a Reply

Your email address will not be published. Required fields are marked *